:::PRESS.IS:::

Enn   hefur Hæstiréttur fellt dóm í meiðyrðamáli þar sem tjáningarfrelsissjónarmið eru talin vega minna en persónu- og æruvernd. Í gær sneri rétturinn við dómi undirréttar í máli Rúnars Þórs Róbertssonar gegn fyrrum ritstjóra DV Sigurjóni M. Egilssyni og Erlu Hlynsdóttur, blaðamanni á DV og dæmdi þau til að greiða Rúnari 150.000 kr. miskabætur. 
Héraðsdómur Reykjavíkur hafði áður sýknað blaðamennina og taldi umfjöllun blaðsins ekki móðgandi eða meiðandi fyrir manninn.

Útgjöld til auglýsinga og markaðseetningar á netinu í Bandaríkjunum munu í fyrsta sinn í ár verða meiri en útgjöld til auglýsinga í prentmiðlum. Þetta er meginniðurstaðan í nýrri spá  rannsóknarfyrirtækisins Outsell um auglýsingakostnað í fjölmiðlum. Í september í fyrra kom fram að Bretland væri fyrsta hagkerfið þar sem meiru væri eytt í auglýsingar á netinu en í prentmiðlum, en nú er þetta semsé talið munu verða í Bandaríkjunum líka. Samkvæmt spánni er þó talið að forskot netsins verði mjög lítið og prentmiðlar munu ekki tapa tekjum, heldur munu netmiðlar einfaldlega fá meira út úr fyrirsjáanlegri aukningu. Talið er að útgöld til auglýsinga muni aukast heldur vestan hafs á árinu og er það haft til marks um að botni fjármálakreppunnar sé náð.  
Sjá einnig hér

Blaðamannaverðlaun Blaðamannafélags Íslands voru afhent  síðdegis við athöfn í Gerðarsafni í Kópavogi. Samhliða voru afhent verðlaun í blaðaljósmyndarakeppninni Myndir ársins.  Þrír blaðamenn voru verðlaunaðir , einn í hverjum flokki verðlaunanna.
Í flokknum „Rannsóknarblaðamennska ársins 2009“  fékk Þórður Snær Júlíusson verðlaunin, en aðrir sem tilnefndir höfðu verið voru Ingi F. Vilhjálmsson og Guðný Helga Herbertsdóttir.
Í flokknum „Besta umfjöllun ársins 2009“ fékk Lóa Pind Aldísardóttir verðlaunin, en aðrir sem voru tilnefndir voru  þeir Magnús Halldórsson og Ragnar Axelsson ásamt Ágústi Inga Jónssyni annars vegar og Svavar Hávarðsson hinsvegar.
Í flokknum „Blaðamannaverðlaun ársins 2009“ fékk Jóhann Hauksson verðlaunin, en aðrir sem voru tilnefndir voru  Þóra Arnórsdóttir og svo skopmyndateiknararnir Gunnar Karlsson og Halldór Baldursson.