:::PRESS.IS:::

Félag fjölmiðlakvenna, FFK, hélt opinn fund um stöðu fjölmiðlakvenna í kreppu í gærkvöldi, 3. febrúar. Metþátttaka var á fundinum en á hann mættu hátt í 100 fjölmiðlakonur. Á fundinum var samþykkt ályktun sem hefst svona:  "Fjölmennum fundi Félags fjölmiðlakvenna, sem haldinn var í Reykjavík 3. febrúar 2010, ofbýður ástandið á ritstjórnum fjölmiðla landsins. Hlutur kvenna hefur ávallt verið rýr innan fjölmiðla. Uppsagnir hafa orðið til þess að konur eru ekki eins sýnilegar á fjölmiðlum og áður og þróunin er uggvænleg. Engar konur eru meðal æðstu stjórnenda stærstu fréttamiðla landsins og í hópi næstráðenda er hlutur kvenna aðeins um þriðjungur. Konum hefur einnig snarfækkað í hópi almennra blaða- og fréttamanna og þáttastjórnenda og var hlutfallið ekki gott fyrir. Einsleitur hópur karla er ráðandi í ákvörðunum um efnistök sem er ekki síst alvarlegt í ljósi þess að nú á sér stað endurmótun íslensks samfélags."

Þóra Kristín Ásgeirsdóttir, formaður Blaðamannafélagsins, segir í Fréttablaðinu í dag að fái fjölmiðlar illa fengnar upplýsingar, hljóti að vera horft til þess hvort almannagasmunir réttlæti birtingu þeirra. Þetta segir Þóra Kristín í tilefni af fréttum um að stolin gögn með trúnaðarupplýsingum lögmanns um ýmsa viðskiptavini hans hafi verið falboðnir fjölmiðlum.  Í Morgunblaðinu í morgun er Eiríkur Tómasson lagaprófessor einnig spurður um þetta mál og er svar hans efnislega það sama, þ.e. að eðli upplýsinganna ráði úrslitum um hvort réttlætanlegt sé að birta þær.

„Þá ber að hafa í huga hvers kvartandi mátti vænta í ljósi ákvæðis innanhússreglna Árvakurs þar sem segir að „Meginreglan er að allur póstur á póstmiðlara fyrirtækisins í persónutengdum pósthólfum er álitinn einkapóstur viðkomandi starfsmanns og verður ekki opnaður af öðrum, nema með leyfi starfsmannsins.". Þá er einnig mikilvægt að starfsmenn fjölmiðla geti tryggt vernd heimildamanna sinna og haldið trúnað við viðsemjendur sína í ljósi hlutverks þeirra í upplýstu samfélagi.“  Þetta segir m.a. í úrskurðarorðum Persónuverndar  út af  skoðun Morgunblaðsins á tölvupósti fyrrum starfsmanns. Var niðurstaðan sú að blaðinu hafi borið að gera honum aðvart áður en skoðunin fór fram og gefa honum kost á að vera viðstaddur. Var þar m.a. litið til innanhúsreglna Morgunblaðsins sjálfs.
Sjá úrskurðinn í heild hér