Bréf í Mecom hækka eftir sölu á Edda Media
Almennt - 06.desember 2011
Thor Eriksen stjóri hjá A-pressen við blaðastanda með titlum útgáfunnar.
Hlutabréf í fjölmiðlarisanum Mecom tóku kipp í gær eftir að staðfest var að samsteypan hefði selt frá sér fjölmiðlafyrirtækið Edda Media, en það fyrirtæki er stórtækt á norskum blaðamarkaði og gefur þar úr 36 fréttablöð. Kaupandi Edda Media var samkeppnisfyrirtækið A-pressen í Noregi, sem á og rekur 49 fréttablöð. Kaupverð Edda Media er um 1,7 milljarður norskra króna, en þreifingar um þessi viðskipti urðu opinberar seint í síðasta mánuði. Öll eru þessi viðskipti háð fyrirvara um samþykki hluthafa og því að samkeppnisyfirvöld og fjölmiðlaeftirlitið fallist á þau. A-pressen og Mecom hafa samhliða þessu gefið til kynna að samstarf kunni að verða með fyrirtækjunum á sviði fjárfestinga og vöruþróun í stafrænni miðlun.
