Roma-fólk í Frakklandi
Alþjóðasamband blaðamanna, IFJ og aðildarsamband þess, Evrópusamband blaðamanna EFJ, hafa sent frá sér harðorð mótmæli
gegn framgöngu franskra stjórnvalda gagnvart Róma-fólkinu (Sígunum) þar í landi og vara við að verið sé að kynda undir
útlendingahatri og vinna gegn umburðarlyndi. Jafnframt gagnrýna samtökin harðlega að blaðamönnum hafi verið torveldaður aðgangur að vettvangi
í tjaldbúðum Rómafólksins þar sem yfirvöld höfðu látið til skarar skríða nú um helgina. IFJ bendir á
að óþolandi sé að blaðamönnum hafi verið meinað að fylgjast með því þegar lögreglan hreinsaði og flutti fólk
með valdi burt af tjaldsvæði sem Róma-fólkið hafði lagt undir sig í miðborg Saint-Etienne, en bæjaryfirvöld höfðu látið
fólkinu í té rennandi vatn og þurrklósett.
Þetta var fyrsta aðgerðin sem lögreglan greip til eftir að Sarkozy forseti tilkynnti um hertar aðgerðir á þessu sviði – m.a. að
fjarlægja Róma- fólk af um 300 svæðum þar sem það hefur komið sér fyrir í leyfisleysi. “Óþolinmæði
og vanstilling stjórnvalda mun einungis leiða til enn frekara útlendingahaturs og kynþáttahyggju. Svona framkoma við fólk sem kemur frá
öðrum Evrópusambandsríkjum er bæði á lagalega gráu svæði og er sérlega varhugaverð, því þetta eykur mjög
á spennu milli samfélaga,” segir Aidan White framkvæmdastjóri IFJ.
Meira hér
