:::PRESS.IS:::

Pólitískir liðsmenn Berlusconis,forsætisráðherra Ítalíu, hafa samþykkt  mjög stífar reglur um umfjöllun um stjórnmál  í ítalska ríkissjónavrpinu RAI. Það var sérstakt  pólitískt  skipað dagskrárráð RAI,   sem ákvað með meirihlutaatkvæðum stuðningsmanna Berlusconi að banna í raun pólitíska umfjöllun í allri dagskrárgerð á RAI í heilan mánuð fyrir sveitarstjórnarkosningarnar sem framundan eru í lok mars. Þessar reglur munu hins vegar ekki ná til einkastöðvanna, en þær eru flestar í eigu Berlusconis eins og kunnugt er.

Samkvæmt nýju reglunum  verður þá og því aðeins hægt að fjalla um pólitísk málefni í þáttum hjá RAI mánuðinn fyrir kosningar ef fulltrúar frá öllum 30 framboðunum eru viðstaddir og fái jöfn tækifæri  til að koma með innlegg. Þetta felur í sér að ekki verður hægt að fjalla um stjórnmál  á forsendum greinandi blaðamennsku í hinum ýmsum dægurmálaþáttum, m.a. þeim sem þekktir eru fyrir að vera gagnrýnir á stjórnvöld. Raunar hafa stuðningsmenn Berlusconis ítrekað haldið því fram að þáttagerð á RAI sé pólitísk og beinist gegn núverandi stjórnvöldum.  Í því ljósi kemur ekki á óvart að ýmsir hafa kallað þessar nýju reglur pólitíska ritskoðun, þar sem þaggað sé niður í umræðu sem setur aðgerðir stjórnvalda í gagnrýnið ljós. Hins vegar hafa ýmsar einkastöðvar verið sagðar hallar undir eiganda sinn, og þar með stjórnvöld.  
Sjá einnig hér