Fréttir

Upplýsingaréttur almennings: Framkvæmd og túlkun upplýsingalaga nr. 50/1996. Fimmtudaginn 22. nóvember kl. 13-17. Kennari Kjartan B. Björgvinsson lögfræðingur við EFTA dómstólinn í Luxemburg. Þátttökugjald kr. 11.800.-. Skráning á námskeiðið. Frekari upplýsingar og lýsing á námskeiðinu HÉRStaðsetning: Húsnæði Endurmenntunarstofnunar HÍ við Dunhaga Markhópur námskeiðsins eru: Stjórnendur hjá stofnunum ríkis og sveitarfélaga, sem þurfa að skipuleggja öðlast yfirsýn um það hvernig ber almennt að vinna úr beiðnum sem berast á grundvelli laganna og hvaða kröfur slíkt gerir til stofnunar þeirra.Starfsmenn stjórnsýslunnar sem leysa þurfa úr álitaefnum um hvort veita eigi aðgang að upplýsingum.Fjölmiðlamenn, fræðimenn og allir aðrir sem áhuga hafa á að nýta sér lögin til að kynna sér gögn og upplýsingar í vörslum stjórnvalda.

Alþjóðamálastofnun Háskóla Íslands í samstarfi við bandaríska sendiráðið býður til opins fundar með Dr. James A. Thurber, mánudaginn 5. nóvember kl. 12 í Lögbergi 101. Dr. Thurber er prófessor við American University í Washington D.C. og forstöðumaður Center for Congressional and Presidential Studies. Í erindi sínu mun Dr. Thurber skoða þau málefni sem helst standa upp úr í lok kosningabaráttunnar og spá í spilin degi fyrir kosningarnar vestanhafs. Meðal þess sem Thurber veltir upp er hvort Obama takist að halda forsetaembættinu eða von sé á nýjum íbúum í Hvíta húsið? Þá spyr hann hvaða málefni hafa staðið upp úr í kosningabaráttunni, og hversu miklu máli frammistaða í kappræðum skipti í raun? Hversu erfitt er að vinna annað kjörtímabil fyrir Obama í ljósi bágs efnahagsástands vestanhafs? Dr. James A. Thurber er einn þekktasti fræðimaður Bandaríkjanna á sínu sviði. Hann hefur skrifað fjölda bóka og meira en 75 fræðigreinar um bandaríska þingið, kosningar og kosningaframboð. Hann er tíður gestur fjölmiðla vestanhafs, vinsæll fyrirlesari víða, þar á meðal hér á landi en hann hélt erindi á vegum Alþjóðamálastofnunar í tengslum við kosningarnar 2008. Fundurinn fer fram á ensku og fundarstjóri er Silja Bára Ómarsdóttir, aðjunkt við Stjórnmálafræðideild Háskóla Íslands. Allir eru velkomnir.

Konur í stjórnmálum – brýnt erindi eða ljótur jakki? Er yfirskrift erindis sem Guðbjörg Hildur Kolbeins mun flytja á fundi hjá Femínistafélagi Íslands nú á fimmtudaginn,1. nóvember. Erindið fjallar um umfjöllun fjölmiðla um konur í kosningabaráttu og hlutfall kynjanna í kosningaumfjöllun fjölmiðla. Hin óvenjulega yfirskrift er sótt í umræðu sem orðið hefur um grænan jakka sem Angela Merkel klæddist í sumar og vakti mikla athygli. Fundurinn verður haldinn á veitingastaðnum Horninu í Hafnarstræti 5 og hefst kl. 20:00

Blaðamannafélag Íslands hefur undanfarin ár gert reglulega launakönnun á meðal fastráðinna félaga í BÍ. Nú er ein slík könnun í bígerð og munu blaðamenn á næstunni fá senda slóð á vefsvæði þar sem þeir geta svarað könnuninni. Könnunin er gerð af fyrirtækinu Intellecta sem er sérhæft í gerð slíkra kannana. Tryggt er að svör eru ekki rekjanleg til einstaklinga eða einstakra vinnustaða og sér Intellecta alfarið um að vinna úr svörunum og skila niðurstöðum til félagsins. Afar mikilvægt er að sem flestir taki þátt í könnuninni svo raunsönn mynd fáist af kjörum félagsmanna og samninganefndin geti haft niðurstöðurnar til samanburðar við aðrar upplýsingar sem eru til um kjör í stéttinni og hver þróunin hefur orðið frá því síðasta könnun var gerð fyrir þremur árum síðan. Hvert og eitt ykkar fáið einnig mikilvægar upplýsingar í hendurnar um það hvað verið er að greiða öðrum í sambærilegum störfum og með sambærilegan bakgrunn hvað varðar menntun, reynslu og ábyrgð.

Þróun fjölmiðla - Þjóðarspegill í HÍ: Guðrún Ásta Guðmundsdóttir og Þorbjörn Broddason: "Hlutlægni frétta í Fréttablaðinu og Morgunblaðinu". Andri Már Sigurðsson: "Adapt or die: Media innovations and the erosion of media boundaries". María Elísabet Pallé og Valgerður Anna Jóhannsdóttir: "Breyttust fjölmiðlar eftir hrun? Umfjöllun prentmiðla um fjármálastofnanir". Guðbjörg Hildur Kolbeins: "Siðferði og starfshættir íslenskra blaða- og fréttamanna"   Sjá nánar: http://www.fel.hi.is/sites/fel.hi.is/files/dagskra_2012_rod2.pdf

Aðalfundur Blaðaljósmyndarafélags Íslands verður haldinn 8. nóvemberl nk. kl. 20.00 í húsnæði BÍ að Síðumúla 23.  Á fundinum verða hefðbundin aðalfundarstörf, svo sem skipun stjórnar og lagabreytingar ef einhverjar tillögur koma fram. Einnig verður farið yfir greinargerð frá nefnd vegna sýningarinnar og svo önnur mál.

Síðdegisfyrirlestur um tjáningarfrelsiSíðastliðið sumar kvað Mannréttindadómstóll Evrópu upp dóma í málum tveggja blaðamanna sem höfðu orðið að sæta ómerkingu ummæla fyrir íslenskum dómstólum og greiða miskabætur vegna skrifa sinna í tvö íslensk blöð. Dómstóllinn komst að þeirri niðurstöðu að íslenska ríkið hefði gerst brotlegt við 10. gr. Mannréttindasáttmála Evrópu,  sem verndar tjáningarfrelsið. Dómarnir hafa verið tilefni umræðu og vakið áleitnar spurningar um réttarstöðu blaðamanna, vernd tjáningarfrelsis, samspil stjórnarskrár og Mannréttindasáttmála Evrópu og hlutverk íslenskra dómstóla á þessu sviði. Um þetta verður fjallað á næsta síðdegisfyrirlestri LOGOS. Dagskrá: 1. Eiríkur Jónsson, dósent við lagadeild Háskóla Íslands - Breyting á réttarstöðu blaðamanna með lögum nr. 38/2011 um fjölmiðla.2. Jakob Möller, hrl. - Frá Þorgeiri Þorgeirsyni til Bjarkar Eiðsdóttur- Dómaframkvæmd Hæstaréttar um tjáningarfrelsi í ljósi Mannréttindasáttmála Evrópu og dóma Mannréttindadómstólsins.3. Almennar umræður.Fundarstjóri verður Fannar Freyr Ívarsson, lögfræðingur. Fundurinn verður haldinn á skrifstofu LOGOS lögmannsþjónustu, Efstaleiti 5, milli 16 og 18 fimmtudaginn 25. október. Boðið verður upp á léttar veitingar. Allir velkomnir en tilkynnið vinsamlegast um þátttöku með því að senda tölvupóst á netfangið oddur@logos.is.

Skemmtun Félags fjölmiðlakvenna í gærkvöldi þótti takast mjög vel. Sjá má umfjöllun um skemmtunina hér.

Kæru fjölmiðlakonur. Loksins er komið að því að halda partý. Takið laugardaginn 8. september frá. Nánar síðar. Stjórnin

Umsóknarfrestur vegna sumarleigu á orlofshúsum Blaðamannafélags Íslands í Stykkishólmi, á Akureyri og í Brekkuskógi er til og með fimmtudeginum 12. apríl næstkomandi. Umsóknareyðublöð á press.is en einnig er hægt að senda tölvupóst á orlofshus@press.is Um er að ræða vikuleigu frá föstudegi til föstudags. Samtals 13 vikur frá 1. júní til og með 31.ágúst. Tilgreinið fleiri en einn möguleika til þess að auðvelda úthlutun. Raðhúsið á Akureyri er með svefnplássi fyrir 7-8Stóra-Brekka með gestahúsi er með svefnplássi fyrir 9-10 í rúmum.Litla-Brekka er með svefnplássi fyrir 5-6.Stykkishólmur er með svefnplássi fyrir 12-14. Vikuleiga fyrir fullgilda félagsmenn Bí á Akureyri og Stóru-Brekku er 20 þús., í Stykkishólmi 25 þús. og vikuleiga fyrir Litlu-Brekku 15 þús. Myndir og uppl. á heimasíðu BÍ press.is Orlofshúsin í Brekku voru endurnýjuð öll að innan fyrir fáum árum síðan og íbúðin á Akureyri var öll endurnýjuð fyrir sex árum síðan og pallurinn við húsið fyrir tveimur árum. Húsið í Stykkishólmi er byggt árið 2006. Orlofssjóður verður ekki með hús í Bolungarvík til leigu í sumar eins og í fyrra. Veiðikort og hótelkort verða hins vegar til sölu eins og á síðasta ári á nýjum orlofsvef sem unnið er að að koma í loftið. Munið 12. apríl. Kv. Hjálmar