Fjölmiðlaverðlaun umhverfisráðuneytisins

Umhverfis- og auðlindaráðuneytið auglýsir eftir tilnefningum til tvennra verðlauna sem afhent verða á Degi íslenskrar náttúru. Annars vegar er um að ræða Fjölmiðlaverðlaun umhverfis- og auðlindaráðuneytisins og hins vegar Náttúruverndarviðurkenningu Sigríðar í Brattholti. Tilnefningarfrestur er til 24. ágúst næstkomandi.

Fjölmiðlaverðlaunum umhverfis- og auðlindaráðuneytisins er ætlað að hvetja til hverskyns umfjöllunar um umhverfi og náttúru, hvort heldur er í því skyni að vekja athygli á einstakri náttúru landsins, benda á þær ógnir sem steðja að umhverfi og náttúru eða mikilvægi þess að vernda og verja umhverfi og náttúru til framtíðar.

Umfjöllun um umhverfismál og náttúru hefur aukist til muna á undanförnum árum, bæði innanlands sem og á alþjóðavísu. Má þar nefna aukinn áhuga á íslenskri náttúru samfara örum vexti í ferðamennsku, loftslagsmálum og mikilvægi þess að stemma stigu við ýmiskonar mengun til að tryggja hreint og heilnæmt umhverfi.

Verðlaunin eru veitt á Degi íslenskrar náttúru, 16. september ár hvert, en þau geta hlotið fjölmiðill, ritstjórn, blaða- eða fréttamaður, dagskrárgerðarfólk, ljósmyndari eða rithöfundur sem hefur skarað fram úr með umfjöllun sinni um umhverfismál og/eða íslenska náttúru undangengna tólf mánuði (tímabilið ágúst – ágúst). Til greina koma einstök verkefni eða heildarumfjöllun um náttúru og umhverfismál.

Þriggja manna dómnefnd skipuð fagfólki á sviði fjölmiðla velur vinningshafa úr innsendum tilnefningum en auk þess hefur dómnefnd svigrúm til að taka til skoðunar fjölmiðlaumfjöllun um umhverfi og náttúru utan tilnefninga.

Tilnefningar með rökstuðningi sendist umhverfis- og auðlindaráðuneytinu, Skuggasundi 1, 101 Reykjavík, eða á netfangið postur@uar.is