Styrktarsjóður

Félagsmenn BÍ sem uppfylla skilyrði Styrktarsjóðs geta sótt um styrki úr sjóðnum.

Almennt eiga þeir rétt sem greitt hefur verið fyrir í Styrktarsjóð í að minnsta kosti sex mánuði. Þetta getur átt við bæði fastráðna blaðamenn og sjálfstætt starfandi eða lausamenn, ef iðgjöld hafa verið greidd samkvæmt reglum sjóðsins.

Réttur til styrkja ræðst af reglum sjóðsins hverju sinni og getur verið háður eðli kostnaðar, tímabilum, hámarksfjárhæðum og fylgigögnum. Ef þú ert í vafa um rétt þinn er best að senda inn fyrirspurn eða hafa samband við skrifstofu BÍ áður en sótt er um.

Almennt þarf að skila fullgildum greiðslukvittunum eða reikningum vegna kostnaðar sem hefur fallið til á síðustu 12 mánuðum.

Í sumum tilvikum þarf einnig að skila viðbótargögnum, til dæmis læknisvottorði, tilvísun, greinargerð frá lækni, greiðsluáætlun frá Fæðingarorlofssjóði eða staðfestingu frá atvinnurekanda. Ef umsókn varðar heilbrigðisþjónustu þarf að koma skýrt fram hvaða þjónusta var veitt, hvenær kostnaður féll til og hver greiddi hann.

Reglur, forsendur og upphæðir

Dánarbætur Sjóðurinn greiðir dánarbætur vegna andláts sjóðfélaga og barna þeirra. Styrkfjárhæð nemur 400 þúsund krónum. ATH: Í kjarasamningi BÍ/SA ber atvinnurekendum að standa straum af líftryggingu fyrir fastráðna blaðamenn. Upphæð dánarbóta fer eftir hjúskaparstöðu og fjölda barna og/eða foreldra á framfæri. (Lágmarksbætur fyrir barnlausan einstakling að 52 ára aldri sem ekki er í sambúð eru árið 2026 kr. 2.500.000, og kr. 11.000.000 til maka hafi hinn látni verið í sambúð lengur en tvö ár eða eignast barn. Dánarbætur falla niður við 67 ára aldur. Sjá nánar gr. 10.3 í kjarasamningi.)

Endurhæfing Greiddur er helmingur kostnaðar vegna endurhæfingar hjá H-L stöðinni.

Fæðingar- og ættleiðingarstyrkir Veittir eru styrkir vegna fæðingar barns eða ættleiðingar að upphæð 150 þúsund krónur. Um greiðslu fæðingarstyrkja gildir að leggja þarf fram greiðsluáætlun frá Fæðingarorlofssjóði um greiðslur í fæðingarorlofi.

Gleraugnastyrkur Tekið er þátt í kostnaði vegna kaupa á gleraugum sem nemur allt að 50% kostnaðar, samkvæmt framlögðu frumriti reiknings, allt að 40 þúsund krónur á 36 mánaða fresti.

Göngumæling og innlegg Greidd eru 75% kostnaðar, þó að hámarki 20 þúsund krónur, vegna göngumælingar og innleggja samkvæmt læknisráði. Sama gildir um sambærileg minniháttar hjálpartæki.

Heilsuefling Veittur er styrkur vegna heilsueflingar sem getur numið allt að helmingi kostnaðar, þó ekki hærri en 20 þúsund krónum á hverju almanaksári, gegn framvísun frumrits reiknings. Styrkurinn gildir vegna útgjalda sem stofnað hefur verið til á árinu. Ekki er endurgreitt vegna tækja- eða útbúnaðarkaupa.

Heilsustofnun Greitt er vegna dvalar á viðurkenndum heilsustofnunum innanlands að læknisráði, allt að 50% kostnaðar, þó ekki meira en 150 þúsund krónur á hverjum 48 mánuðum.

Heyrnartækjastyrkur Tekið er þátt í kostnaði vegna kaupa á heyrnartækjum sem nemur allt að 50% kostnaðar, samkvæmt framlögðu frumriti reiknings, allt að 200 þúsund krónur að frádregnum styrk frá Sjúkratryggingum. Sækja má um styrk á fjögurra ára fresti.

Hjartaskoðun Eftirlit vegna hjartasjúkdóma er greitt að hálfu.

Krabbameinsskoðun Krabbameinsskoðanir eru greiddar að hálfu.

Lasermeðferð á augum Greiddur er 75 þúsund króna styrkur vegna aðgerðar á hvoru auga. Sama gildir um augasteinaskipti.

Laun í veikindum Styrktarsjóður tryggir laun í þrjá mánuði til viðbótar kjarasamningsbundnum réttindum, sem nema 80% af grunni inngreiðslna sjóðfélaga í sjóðinn síðustu 12 mánuði áður en greiðslur féllu niður, þó að hámarki 80% hámarkslauna skv. kjarasamningi. Sjóðurinn greiðir ekki sjúkradagpeninga í þeim tilvikum þar sem sjóðfélagi nýtur greiðslna vegna tekjutaps fyrir sama slys eða veikindatímabil annars staðar frá, t.d. úr slysatryggingu launafólks eða vegna slysa af völdum vélknúinna ökutækja. Séu slíkar greiðslur lægri en útreiknaðir sjúkradagpeningar frá styrktarsjóði BÍ er sjóðnum heimilt að greiða mismuninn.

Mikil útgjöld vegna heilbrigðisþjónustu Sé um mikil útgjöld að ræða vegna heilbrigðisþjónustu sem fellur ekki undir neinn lið hér að ofan er hægt að sækja sérstaklega um styrk vegna hluta kostnaðar til stjórnar sjóðsins. Umsókn skal studd gögnum, t.d. tilvísun, vottorði og/eða greinargerð frá lækni, ásamt reikningum vegna útlagðs kostnaðar.

Sálfræðikostnaður Greitt er allt að 112.500 krónur á ári samkvæmt nánari reglum: að hámarki 7.500 krónur fyrir hvert skipti, fyrir allt að 15 skipti á hverjum tólf mánuðum.

Sjúkraþjálfun og nudd Sjóðurinn greiðir helming kostnaðar vegna sjúkraþjálfunar og sjúkranudds hjá faglega viðurkenndum aðila sem hefur löggildingu viðkomandi starfsstéttar frá embætti landlæknis, að hámarki 30 þúsund krónur á ári.

Tannlæknakostnaður Greiddur er eingreiðslustyrkur sem nemur 50% kostnaðar umfram 200 þúsund krónur vegna tannlæknakostnaðar af heilsufarsástæðum. Styrkur getur aldrei orðið hærri en 200 þúsund krónur undir þessum lið.

Tæknifrjóvgun Heildarstyrkur vegna tæknifrjóvgunar nemur 50% af kostnaði skv. gjaldskrá Sjúkratrygginga Íslands, þó að hámarki 160 þúsund krónur. (Þ.e. aldrei er hægt að fá meira en 160 þúsund krónur samanlagt úr sjóðnum undir þessum lið.)

Almennt gildir að forsenda endurgreiðslu er framvísun fullgildra greiðslukvittana vegna útlagðs kostnaðar sem fellur til á síðustu 12 mánuðum.

Samþykkt á fundi styrktarsjóðs 18. mars 2025.

Styrkir eru greiddir samkvæmt úthlutunarreglum Styrktarsjóðs. Fjárhæðir geta verið mismunandi eftir tegund styrks og eru oft háðar hámarki, tímabili eða hlutfalli af kostnaði. Sumir styrkir eru greiddir sem föst fjárhæð. Aðrir eru greiddir sem hlutfall af kostnaði gegn framvísun reiknings eða kvittunar. Styrkur er almennt greiddur til sjóðfélaga eftir að umsókn hefur verið yfirfarin og samþykkt.

Styrktarsjóður getur greitt sjúkradagpeninga þegar kjarasamningsbundinn veikindaréttur er fullnýttur.

Sjúkradagpeningar eru greiddir í allt að þrjá mánuði til viðbótar kjarasamningsbundnum réttindum. Greiðslan miðast við 80% af grunni inngreiðslna sjóðfélaga í sjóðinn síðustu 12 mánuði áður en greiðslur féllu niður, þó að hámarki við 80% hámarkslauna samkvæmt kjarasamningi. Sjóðurinn greiðir ekki sjúkradagpeninga ef sjóðfélagi fær greiðslur vegna sama tekjutaps annars staðar frá, til dæmis úr slysatryggingu launafólks. Ef slíkar greiðslur eru lægri en útreiknaðir sjúkradagpeningar frá Styrktarsjóði BÍ getur sjóðurinn greitt mismuninn.

Sjálfstætt starfandi blaðamenn og lausamenn geta átt rétt á styrkjum úr Styrktarsjóði samkvæmt reglum sjóðsins, ef greitt hefur verið fyrir þá í sjóðinn og skilyrði um réttindaávinnslu eru uppfyllt.

Sérreglur gilda um sjúkradagpeninga sjálfstætt starfandi. Þar skiptir meðal annars máli hvort og hvernig greiðslur hafa borist í sjóðinn og hvaða gögn fylgja umsókn.

Lesa nánar: Sjúkradagpeningar vegna sjálfstætt starfandi

Nákvæmar reglur um styrki, hámarksfjárhæðir, tímabil og fylgigögn koma fram í úthlutunarreglum og reglugerð Styrktarsjóðs.

Áður en sótt er um er gott að skoða hvort styrkurinn sem þú ætlar að sækja um sé háður sérstöku tímabili, hámarksfjárhæð eða læknisfræðilegum gögnum.

Reglur Styrktarsjóðs voru síðast samþykktar á fundi sjóðsins 18. mars 2025.