Ályktun stjórnar BÍ um ákvörðun Sýnar um að leggja niður sjónvarpsfréttir

Stjórn Blaðamannafélags Íslands lýsir miklum vonbrigðum með ákvörðun stjórnar Sýnar um að leggja niður sjónvarpsfréttir frá og með 1. september, eftir nær 40 ára sögu.

Sjónvarpsfréttir Sýnar (áður Stöðvar 2) hafa um áratuga skeið verið mikilvægur hluti íslenskrar fjölmiðlaflóru og veitt Ríkisútvarpinu mikilvæga samkeppni. Þar hefur starfað öflugt og reynslumikið fréttafólk sem hefur flutt landsmönnum fréttir af stórum og smáum atburðum, varpað ljósi á samfélagið og veitt stjórnvöldum og öðrum valdhöfum nauðsynlegt aðhald.

Ákvörðunin veikir ekki aðeins fjölmiðilinn sjálfan heldur íslenskt fjölmiðlaumhverfi í heild og þar með lýðræðislega umræðu. Hér er ekki eingöngu um breytingu á miðlunarformi að ræða. Afleiðingin er að færri fréttir verða til, fjölbreytni í fréttaumfjöllun minnkar og leiðum almennings til að afla sér frétta fækkar.

Sjónvarpsfréttir gegna sérstöku hlutverki. Á tímum aukinnar skautunar og örra breytinga á upplýsingamiðlun skiptir máli að almenningur hafi aðgang að fjölbreyttum ritstýrðum fréttamiðlum sem starfa eftir faglegum viðmiðum. Þegar alvarlegir atburðir eða neyðarástand skapast verður sjónvarpið auk þess gjarnan ein helsta upplýsingaveita almennings. Þá skiptir miklu að fleiri en einn öflugur fréttamiðill hafi getu, mannafla og reynslu til að miðla upplýsingum hratt og af fagmennsku.

Ákvörðunin er jafnframt mikið áfall fyrir það starfsfólk sem nú missir störf sín. Frá einum vinnustað hverfur mikil þekking, reynsla og fagmennska sem hefur byggst upp á áratugum.

Blaðamannafélag Íslands, félagsmenn þess, útgefendur, fræðimenn og aðrir sérfræðingar hafa um árabil varað við viðkvæmri stöðu íslenskra fjölmiðla. Þessi ákvörðun stjórnar Sýnar er enn eitt áfallið fyrir íslenskan fjölmiðlamarkað.

Sú staða blasir nú við að á Íslandi er aðeins eitt prentað dagblað gefið út og einungis einn fjölmiðill sendir út fréttir í sjónvarpi, ríkismiðillinn.

Fjölbreyttir, öflugir og sjálfstæðir ritstýrðir fjölmiðlar eru ein af grunnstoðum lýðræðisins. Það er ekki sjálfgefið að þeir geti sinnt því hlutverki við þær aðstæður sem nú ríkja á íslenskum fjölmiðlamarkaði.

Sú þróun sem við blasir kallar á sterk viðbrögð til að tryggja að hér geti áfram þrifist fjölbreytt og öflug blaðamennska. Ábyrgðin er sameiginleg. Fyrirtæki þurfa að auglýsa í íslenskum fréttamiðlum í auknum mæli, eigendur fjölmiðla þurfa að gera sér grein fyrir samfélagslegri ábyrgð sinni, stjórnvöld þurfa að ráðast í enn frekari aðgerðir til stuðnings rekstrarumhverfis fjölmiðla og almenningur þarf að styðja við blaðamennsku með áskriftum.