Fréttir

Bloomberg News hefur fyrst alþjóðlegra fréttaveita ráðið íslenskan blaðamann til starfa en það er Ómar Valdimarsson. Honum er fyrst og síðast ætlað að fjalla um íslensk viðskipti, efnahagsmál og stjórnmál. Ómar hóf störf í gær eftir að hafa sinnt Bloomberg sem verktaki frá því í maí 2009. Ómar segir að hugsanlega verði blaðamönnum fjölgað eftir því sem fram líða stundir. „Helsta breytingin sem er þessu samfara er að nú get ég helgað mig alfarið fréttaöflun fyrir Bloomberg, þó svo að í raun hafi þetta verið fullt starf frá því að ég byrjaði í maí 2009. Til marks um umfangið hefur Bloomberg birt á bilinu 20 til 60 fréttir um atburði á Íslandi í hverjum mánuði, á síðastliðnum fjórum árum. Að sögn Ómars hefur Bloomberg mikinn áhuga á að efla enn frekar fréttaumfjöllun frá Íslandi sem og frá Skandinavíu. Til marks um það starfa hjá Bloomberg alls um 25 blaðamenn í Osló, Stokkhólmi, Helsinki, Kaupmannahöfn og nú Reykjavík, sem allir helga sig fréttum sem kunna að hafa áhrif á markaði, svo sem skuldabréfamarkaði, hlutabréfamarkaði eða markaði með gjaldmiðla og afleiður. Ómar segir að þessi hópur muni vaxa á komandi árum og það megi leiða líkur að því að eftir því sem eftirspurnin eftir fréttum frá Íslandi aukist muni starfseminni hér á landi vaxa fiskur um hrygg. „Margt af því sem hefur verið sagt og gert á Íslandi í gegnum árin hefur gjarnan verið hugsað til „heimabrúks" af stjórnmálamönnum og aðilum í viðskiptalífinu. Með aukinni fréttaumfjöllun um Ísland er sá tími, að aðilar í áhrifastöðum geti sagt eitthvað eitt hér heima og predikað annað á erlendum vettvangi, liðinn," sagði Ómar.

Blaðamannaverðlaun Blaðamannafélags Íslands fyrir árið 2012 voru afhent í Gerðarsafni fyrr í dag. Verðlaun voru veitt í fjórum flokkum auk þess að veitt voru verðlaun fyrir Mynd ársins, en hana tók Kjartan Þorbjörnsson. Einnig voru veitt verðlaun fyrir myndir og myndskeið í átta flokkum hjá Blaðaljósmyndarafélagi Íslands. Blaðamannaverðlaunin hlutu þessir: Sunna Valgerðardóttir fékk verðlaun fyrir bestu umfjöllun; Jóhann Bjarni Kolbeinsson fyrir rannsóknarblaðamennsku ársins; Sigmar Guðmundsson fékk verðlaun fyrir viðtal ársins og Ragnar Axelsson fékk blaðamannaverðlaun ársins. Hér á eftir fer rökstuðningur dómnefndar fyrir verðlaununum: Umfjöllun ársins 2012Sunna Valgerðardóttir, Fréttablaðinu, fyrir áhrifamikla, heildstæða og vel unna röð fréttaskýringa um stöðu geðsjúkra. Fréttaskýringaflokkur Sunnu tók með yfirgripsmiklum hætti á flóknu og vandasömu vandamáli sem skoðað var frá mörgum hliðum. Í umfjölluninni voru ýmis álitamál dregin fram í dagsljósið sem ekki hafa farið hátt og nýju ljósi varpað á önnur sem urðu tilefni sjálfstæðra frétta, bæði á forsíðu blaðsins og víðar. Jafnvægi var í umfjölluninni, þar sem teflt var saman í hæfilegum hlutföllum lífsreynslusögum geðfatlaðra einstaklinga og sjónarmiðum hinna ólíku fulltrúa stjórn- og heilbrigðiskerfisins auk þess sem staða mála var borin saman við nágrannalönd. Greinarflokkurinn var vel skrifaður, uppbygging markviss og framsetning var lífleg og aðgengileg fyrir lesendur. Rannsóknarblaðamennska ársins 2012Jóhann Bjarni Kolbeinsson, fréttastofu RÚV, fyrir uppljóstrandi og ítarlega umfjöllun um kadmíum í áburði annars vegar og notkun iðnaðarsalts í matvælum hins vegar. Mikilvægt hlutverk blaðamanna er að veita valda- og stjórnkerfum samfélagsins aðhald, ekki síst þeim stofnunum sem sjálfar eiga að veita aðhald og eftirlit. Rannsókn Jóhanns Bjarna á starfsháttum Matvælastofnunar leiddi í ljós að stofnunin hefði brugðist hlutverki sínu í mikilvægum atriðum. Hann upplýsti um að allt of mikið af þungmálminum kadmíum hefði verið í þúsundum tonna af áburði frá Skeljungi sem notaður var vorið 2011 og að Matvælastofnun hefði ekki stöðvað dreifinguna þrátt fyrir að hafa vitað af ágöllum áburðarins, heldur aðeins upplýst söluaðila sem síðan hélt viðskiptavinum sínum óupplýstum í hálft ár. Jóhann Bjarni fylgdi málinu vel eftir og annað mál af svipuðum toga fylgdi beint í kjölfarið þegar hann upplýsti fyrstur manna um að Ölgerðin hafði í stórum stíl selt iðnaðarsalt til matvælaframleiðenda og að hvorki Matvælastofnun né Heilbrigðiseftirlit Reykjavíkur höfðu upplýst um málið eftir að það kom upp innanhúss hjá þeim. Í báðum þessum tilvikum voru fréttirnar og öll undirbúningsvinna traust og til fyrirmyndar, enda vöktu þessi mál almenna athygli og drógu fram í dagsljósið vinnubrögð og starfshætti sem rík ástæða var til að breyta.     Viðtal ársins 2012Sigmar Guðmundsson, Kastljósi, fyrir sérstaklega áhrifaríkt og sterkt viðtal við Eirík Inga Jóhannsson sjómann sem komst lífs af þegar togarinn Hallgrímur fórst. Eiríkur Ingi hafði stórbrotna harmsögu að segja aðeins viku eftir að hann hafði einn komist lífs af úr skelfilegu sjóslysi. Hér var Kastljós með efnivið um harmrænan atburð og alvarlega frásögn sjómannsins. Það er vandaverk sem krefst þekkingar og reynslu blaðamanns að koma bæði atburðinum til skila svo og frásögn sögumanns. Þetta kallaði á óvenjulega lausn. Sigmar Guðmundsson sýndi bæði sögunni og sögumanni verðskuldaða virðingu þegar hann ákvað að þverbrjóta allar reglur Kastljóss um efnismeðferð og lét frásögn Eiríks flæða í fullri lengd og ótruflaða. Ritstjórn og blaðamennska felst iðulega í því að stytta, stýra og spyrja þannig að henti þeim miðli og því formi sem við á hverju sinni. Hér var efnið meðvitað ekki lagað að rammanum heldur ramminn að efninu í þessu lang lengsta sjónvarpsviðtali í manna minnum. Viðfangsefnið var vandmeðfarið, ekki síst í ljósi þess hve stutt var frá slysinu og siðareglur blaðamennskunnar gera miklar kröfur í slíkum tilfellum. Þessum kröfum var mætt með góðum undirbúningi og viðtalið tekið eftir samráð við og samþykki sálfræðings Eiríks Inga og umræður við hann sjálfan. Blaðamannaverðlaun ársins 2012Ragnar Axelsson, Morgunblaðinu, fyrir merka umfjöllun og myndir af stórum pollum á Grænlandsjökli sem voru til marks um óvenju mikla bráðnun jökulsins. Einlægur áhugi Ragnars á mannlífi og náttúru á norðurslóðum hefur á umliðnum árum komið fram í glæsilegri umfjöllun í máli og myndum og vakið alþjóðlega athygli. Umfjöllun hans um fjölda stórra nýrra vatna eða polla norðarlega á Grænlandsjökli sem rekja má til hlýnunar jarðar er engin undantekning. Eftir að hafa sjálfur uppgvötað þessar náttúrufarsbreytingar á jöklinum úr flugvél fór blaðamaðurinn Ragnar Axelsson aftur á staðinn til að mynda og skoða fyrirbærið með það að markmiði að greina umheiminum frá því. En í stað þess að sýna sérfræðingum myndir og segja þeim frá málinu fékk hann Harald Sigurðsson jarðfræðing með sér á staðinn til að leggja mat á þær breytingar sem þarna höfðu orðið. Útkoman var stórglæsileg umfjöllun í máli og myndum sem ber vitni um vönduð vinnubrögð, skipulagningu og útsjónarsemi samfara næmum skilningi á samspili mynda og texta í fjölmiðlun, ekki síst í umfjöllun um umhverfismál.

Steinunn Stefánsdóttir hefur hætt sem aðstoðarritstjóri á Fréttablaðinu í kjölfar breytinga sem gerðar voru á yfirstjórn ritstjórnarinnar. Nú eru tveir aðalritstjórar á blaðinu, þeir Mikael Torfason og Ólafur Stephensen. Steinunn segir í tilkynningu til samstarfsmanna að hún hætti í samkomulagi við forstjóra fyrirtækisins. RÚV hefur eftir henni að brotthvarf hennar tengist breytingum á yfirstjórn ritstjórnar enda tæplega þörf á aðstoðarritstjóra með tvo aðalritstjóra. Sjá frétt á vísir.is hér

Mikael Torfason hættir sem ritstjóri Fréttatímans og í hans stað mun koma Sigríður Dögg Auðunsdóttir. Mikael mun taka við starfi ritstjóra á Fréttablaðinu við hlið Ólafs Stephensen núverandi ritstjóra Fréttablaðsins. Sjá frétt á visir.is hér

Blaðamannaverðlaun Íslands og viðurkenningar í Myndir ársins, ljósmyndasamkeppni Blaðaljósmyndarafélags Íslands verða afhentar í Gerðarsafni í Kópavogi á laugardaginn, 9. mars kl 15:00. Samhliða verður opnuð sýning BLÍ Myndir ársins og verður athöfnin með svipuðu sniði og undanfarin ár. Eins og fram hefur komið hér á síðunni hefur dómnefnd Blaðamannaverðlaunanna tilnefnt tólf manns til verðlaunanna í fjórum flokkum og mun á laugardag verða tilkynnt hverjir þessara blaðamanna hljóta verðlaunin. Þetta er í tíunda sinn sem verðlaunin eru afhent. Tilnefningarnar má sjá hér

Ástæða er til að vekja athygi íslenskra blaðamanna á nýju samskipta og samhjálparneti blaðamanna sem verið er að byggja upp. Um er að ræða vefsíðuna www.travelingjournalist.com sem er sérstaklega ætluð blaðamönnum eða starfsmönnum fjölmiðla sem eru á ferðinni eða þurfa upplýsingar, aðstoð við rannsóknir, sambönd, húsaskjól á ferðum sínum um heiminn eða hvaðeina sem tengist blaðamennsku. Með þessu, segja aðstandendur geta blaðamenn ferðast um á ódýrari hátt og kynnst kollegum í leiðinni. Sjá meira hér

Hér á eftir eru birtar tilnefningar dómnefndar til blaðamannaverðlauna fyrir árið 2012.  Tilnefningar eru þrjár í hverjum flokki, en flokkarnir eru nú fjórir þar sem flokkurinn "Viðtal ársins" er nú með í fyrsta sinn. Samkvæmt reglugerð verðlaunanna eru tilnefningar dómnefndar birtar viku fyrir afhendingu verðlaunanna sjálfra en Blaðamannaverðlaunin verða afhent í Gerðarsafni á laugardaginn kemur, 9. mars kl. 15:00. Tilnefningarnar eru sem hér segir:    Umfjöllun ársinsEgill Ólafsson, mbl.is (Morgunblaðinu), fyrir vandaðan, skjótan og alhliða fréttaflutning af illviðri og snjókomu í september 2012, þar sem frá upphafi var dregin fram og skilgreind yfirvofandi ógn fyrir fólk og búfénað. Kristjana Guðbrandsdóttir, DV, fyrir viðamikinn og vandaðan greinaflokk um einhverfu, ýmsar birtingarmyndir hennar og vandamál við greiningu, ekki síst hjá stúlkum. Sunna Valgerðardóttir, Fréttablaðinu, fyrir áhrifamikla, heildstæða og vel unna röð fréttaskýringa um stöðu geðfatlaðra.                 RannsóknarblaðamennskaAndri Ólafsson, Stöð 2, fyrir afhjúpandi fréttir af aðkallandi fjárhagsvanda hjúkrunarheimilisins EIR Jóhann Bjarni Kolbeinsson, fréttastofu RÚV, fyrir uppljóstrandi og ítarlega umfjöllun um kadmíum í áburði annars vegar og notkun iðnaðarsalts í matvælum hins vegar. Jóhannes Kr. Kristjánsson, Kastljósi, fyrir að draga fram óbirtar og gagnrýnar skýrslur Ríkisendurskoðunar um bókhaldskerfi ríkisins og fyrir að varpa, ásamt Helga Seljan ljósi á umdeild atriði varðandi innleiðingu kerfisins.   Viðtal ársinsAnna Brynja Baldursdóttir, Vikunni, fyrir opinskátt viðtal við Agnesi M. Sigurðardóttur, biskup sem tjáði sig þar með einlægum hætti um bæði persónuleg mál sín og atriði sem varða embættið. Sigmar Guðmundsson, Kastljósi, fyrir sérstaklega áhrifaríkt og sterkt viðtal við Eirík Inga Jóhannsson, sjómann sem komst lífs af þegar togarinn Hallgrímur fórst. Skapti Hallgrímsson, Morgunblaðinu, fyrir sérstaklega vel skrifað og lifandi mannlífsviðtal við eistneska tónlistarmanninn Valmar Valjaots. Blaðamannaverðlaun ársins Ingi Freyr Vilhjálmsson, DV, fyrir umfjöllun um fiskveiðar Íslendinga við Afríku og ýmis skrif um viðskipti og uppgjör í kjölfar hrunsins.   Ragnar Axelsson, Morgunblaðinu, fyrir merka umfjöllun og myndir af stórum pollum á Grænlandsjökli sem voru til marks um óvenju mikla bráðnun Grænlandsjökuls.   Una Sighvatsdóttir, mbl.is (Morgunblaðinu), fyrir greinaflokkinn Váin á vegum, þar sem fjallað var um umferðarslys frá mörgum sjónarmiðum með því að tvinna saman ýmsar fjölmiðlagáttir s.s. prentmiðilinn, netið, gagnvirka grafíska framsetningu og myndskeið.

Guardian News & Media (GNM) sem meðal annars gefur út Guardian, Observer og guardian.co.uk, hefur samið við Blaðamannasamband Bretlands NUJ um sparnaðaraðgerðir hjá fyrirtækinu. Þar með er afstýrt aðgerðum af hálfu NUJ sem boðaðar höfðu verið vegna 7 milljón punda niðurskurðar sem boðaður hafði verið hjá fyrirtækinu í fjáhagsáætlun sem birt var á síðasta ári. Samkvæmt þeim áformum stóð til að fara út í stórfelldar uppsagnir ef ekki væri hægt að ná markmiðunum með öðrum hætti.Sjá einnig hér