Fréttir

 Þrátt fyrir gríðarlegt flæði ókeypis upplýsinga og fréttaefnis sem ungu fólki stendur til boða í dag þá virðist sem  stór hluti þessa fólks sé enn tilbúið til að borga fyrir það fréttaefni sem það fylgist með. Þannig kemur fram í nýlegri könnun í Bandaríkjunum að um 40% Ameríkana á aldrinum 18-34 ára borgi fyrir að minnsta kosti  hluta af því fréttaefni sem það notar, hvort heldur sem það er í formi dagblaðs, netáskriftar eða rafræns fréttabréfs.  Þessu til viðbótar segja um 13% nýta sér áskrift einhvers annars til að kynna sér fréttir.  Könnun þessi er gerð í verkefninu Media Insight Project sem er samstarfsverkefni  American Press Institute og Associated Press- NORC Center.  Einnig kom í ljós að eftir því sem fólk í þessum aldurshópi var eldra, því líklegra var það til að greiða fyrir fréttaefni.  Sjá einnig hér    

Hér með er minnt á að Gagnsæi – samtök gegn spillingu,  ásamt Stofnun stjórnsýslufræða og stjórnmála  standa fyrir opinni málstofu í dag, þriðjudaginn 29. september í fyrirlestrarsal Þjóðminjasafns Íslands, kl. 16:30-17:30.   Þar mun Paul Stephenson, fyrrum embættismaður breska dómsmálaráðuneytis, halda fyrirlestur um mikilvægi löggjafar um vernd uppljóstrara. Hann hefur sérhæft sig í málefnum uppljóstrara eftir að hann lét af störfum hjá breska dómsmálaráðuneytinu árið 2009. Lögin um verndun uppljóstrara voru sett í Bretlandi árið 1999, en þau lög eru, að hans sögn, eitt helsta framlag Bretlands til þessara mála á alþjóðavísu. Stephenson leiddi starf dómsmálaráðuneytisins á sviði varna gegn spillingu, sem formaður sendinefndar Breta hjá GRECO, spillingarvarnardeild Evrópuráðsins, sem Ísland er einnig aðili að.  Að fyrirlestrinum loknum mun fundarstjóri, Þórunn Elísabet Bogadóttir, aðstoðarritstjóri Kjarnans, stýra fyrirspurnum og umræðum. Málstofan er öllum opin og mun fara fram á ensku  

Mjög áhugaverðar upplýsingar um auglýsingamarkaðinn á Íslandi árið 2014  hafa verið birtar á vef Fjölmiðlanefndar en þar er í fyrsta sinn tekið saman hvernig auglýsingar  eða birtingarfé skiptis milli miðla á Íslandi.  Í ljós kemur að prentmiðlar fá stærstan hluta auglýsingakökunnar en sjónvarp fylgir fast á eftir. Þá  kemur í ljós að 2,6% alls birtingarfjár rennur til erlendra veffyrirtækja s.s. Google og Facebook sem er minna en í nágrannalöndum okar.  Samantektin er unnin í samstarfi Fjölmiðlanefndar og fimm stærstu birtingarhúsanna á Íslandi.  Sjá nánar hér  

Búist er við að  Al-Jazeera  muni skera niður starfsemina hjá sér víðs vegar um heiminn og segja upp hundruðum manna vegna þess að olíuverð hefur fallið og vegna þess að búist er við miklum breytingum í fjárfestingastefnu. Þessi tíðindi koma nokkuð á óvart  því ekki eingöngu er talað um fækkun starfa um 800-1000 heldur hugsanlega líka að emírinn af Quatar muni draga verulega úr stuðningi við og hafi minni áhuga á fréttaþjónustu fyrirtækisins en faðir hans hafði, en Al Jazzeera hefur verið árangursrík leið til að hafa áhrif í arabaheiminum og raunar mun víðar.  Sjá nánar hér  

Þáttaröðin „Lífríkið í sjónum við Ísland“ eftir þá Erlend Bogason og Pétur Halldórsson  fékk í gær fjölmiðlaverðlaun umhverfis- og auðlindaráðuneytisins. Við sama tækifæri fengu  annars vegar hjónin Björn Halldórsson og Elisabeth Hauge á Valþjófsstöðum í Öxarfirði og hins vegar Völundur Jóhannesson á Egilsstöðum Náttúruverndarviðurkenningu Sigríðar í Brattholti. Í rökstuðningi dómnefndar fjölmiðlaverðlauna segir að þættirnir „Lífríkið í sjónum við Ísland“ séu dæmi um metnaðarfulla þáttagerð þar sem kastljósinu sé beint að heimi undir yfirborði sjávar sem flestum er hulinn. Myndefnið sé einstakt og handritið vel unnið og samvinna höfunda hafi skilað frábærum árangri sem eftir sé tekið og hafi borið hróður þeirra langt út fyrir landsteinana. Verkefnið sé „bæði skemmtilegt og fróðlegt og hefur meðal annars sérstöðu að því leyti að það er afrakstur framtaks sem var unnið umfram skyldu, af metnaði og áhuga og aðdáunarverðri seiglu.“ Þeir sem höfðu verið tilnefndir til fjölmiðlaverðlaunanna voru: Hallgrímur Indriðason, fréttamaður á RÚV, sem gerði deiluefni um virkjanakosti í Þjórsá góð skil í sjónvarpsfréttum 17. maí sl. Iceland Review, sem sagði frá eldgosinu í Holuhrauni í fjölda vandaðra og upplýsandi greina og með ljósmyndum sem komu hrikafegurð eldsumbrotanna og áhrifum þeirra á viðkvæma náttúru vel til skila. Þáttaröðin „Lífríkið í sjónum við Ísland“, sem er röð stuttra þátta ætluð til vekja athygli á fjölbreyttu náttúrulífi neðansjávar og sýnd var á sjónvarpsstöðinni N4.  

Ástæða er til að benda blaðamönnum á tækifæri sem þeim gefst til að hafa áhrif á endurbætur sem nú er verið að gera á stjórnarráðsvefnum, en það er vefur sem blaðamenn þurfa mikið að nota.  Áhrifin geta þeir haft í gegnum könnun sem gerð er í tengslum við breytingarnar. Á vef forsætisráðuneytisins segir: „Bætt þjónusta við notendur og aukin hagkvæmni eru helstu markmið í vinnu sem hafin er og miðar að því að hleypa um mitt næsta ár af stokkunum nýjum og sameinuðum vef allra ráðuneyta.   Með sameiningu vefjanna batnar aðgengi til muna með því að notendur geta á einum stað sótt upplýsingar og þjónustu á vegum ráðuneyta með auðveldum hætti. Um leið er þess vænst að talsvert hagræði sé af því að viðhalda einum vef, en í dag eru vefir á vegum Stjórnarráðsins á fimmta tug þegar allt er talið.“ Sjá könnun hér Sjá frétt hér   

Það voru engar myndir í þýska blaðinu Bild í  gær.  Bild tók einnig út allar ljósmyndir á heimasíðunni.    „Með þessu vildi ritstjórn blaðsins vekja fólk til umhugsunar um stöðu flóttafólks og einnig að mótmæla þeirri gagnrýni sem það fékk fyrir að birta mynd af látnum sýrlenskum dreng“, segir í áhugaverðri umfjöllun Þorvaldar Arnar Kristmundssonar ljósmyndara í pistli á fréttavef fjölmiðlafræðinema við Háskólann á Akureyri, Landpóstinum. Hér má sjá pistil Þorvaldar Hér má sjá annan pistil frá Þorvaldi um breytinguna á útliti Fréttablaðsins   http://www.landpostur.is/is/frettir/almennt/mynd-an-mynda

  Í dag eru 40 ár liðin frá því að Dagblaðið var stofnað. Stofnun DB  markaði mikil tímamót í íslenskri fjölmiðlasögu og er tvímælalaust mikilvæg varða á leið blaðanna frá flokksblaðamennsku yfir í markaðsfjölmiðlun.  DV minnist stofnunar DB með veglegum hætti í dag og þar er m.a. að finna hringborðsumræður fimm starfsmanna DB  sem voru með frá byrjun sem Björn Jón Bragason stýrir. Þetta eru umræður þeirra  Jóhannesar Reykdal, útlitsteiknara blaðsins (JR), Jóns Birgis Péturssonar fréttastjóra (JBP), Sigurðar Hreiðars blaðamann (SH), Más E. M. Halldórssonar afgreiðslustjóra (MH) og Sveins R. Eyjólfssonar framkvæmdastjóra (SRE). Hér má sjá þessar hringborðsumræður  

Mánudaginn 7. september verður haldinn fundur í fundarsal Þjóðminjasafnsins undir yfirskriftinni „Ógnir við tjáningarfrelsi  í fjölmiðlum og á internetinu“. Dunja Mijatovic, fulltrúi ÖSE fyrir frelsi fjölmiðla, mun fjalla um þær áskoranir sem frjálsir fjölmiðlar og tjáningarfrelsi standa frammi fyrir á ÖSE svæðinu. Í erindi sínu mun hún meðal annars ræða um hvernig áróðri er markvisst beitt í milliríkjaátökum og segja frá því hvernig öryggi blaðamanna og bloggara  er víða ógnað, ekki síst kvenna sem starfa í fjölmiðlum. Fundurinn hefst kl 12.15 og stendur til kl 13.30. Um Dunja Mijatovic hér