Fréttir

DV var í gær í Héraðsdómi Reykjavíkur dæmt fyrir meiðandi ummæli í garð Jóns Þorsteins Jónssonar með fréttaflutningi um ólögmætan flutning Jóns Þorsteins á fjármagni út úr landinu dulbúnum sem lánsviðskiptum. Alls eru dæmd dauð og ómerk nokkur ummæli á forsíðu og inni í blaðinu. Er Ingi Freyr Vilhjálmsson höfundur fréttarinnar og er hann dæmdur sem höfundur hennar fyrir það sem birtist inni í blaðinu, en Reynir Traustason sem ábyrgðarmaður umfjöllunar á forsíðu. Alls eru Jóni Þorsteini dæmdar 300.000 kr í miskabætur (10x minna en farið var fram á) og þeir DV menn þurfa að greiða rúmlega 1,3 milljón í málskostnað og standa straum af 400 þúsund króna kostnaði vegna birtingar dómsins í Morgunblaðinu og Fréttablaðinu. Fram kemur í dóminum að fréttin hafi verið efnislega röng hvað varðaði þessi viðskipti. Athyglisverðir kaflar eru í röksemdafærslu dómarans Kristrúnar Kristinsdóttur þar sem hún ræðir um tjáningarfrelsið og rétt fjölmiðla annars vegar og friðhelgi einkalífsins hins vegar: "Í dómaframkvæmd Mannréttindadómstóls Evrópu hefur umfjöllun um málefni sem teljast hafa samfélagslega þýðingu, verið játað æ meira svigrúm í jafnvægismati við vernd friðhelgi einkalífs. Umfjöllun um brot gegn lögum um gjaldeyrishöft verður að telja af því tagi. Það verður þó að gera þá kröfu til fjölmiðla að slíkt svigrúm sé þá í raun notað til þess að fjalla um hin samfélagslega mikilvægu málefni. Jákvæðum áhrifum þess að fjölmiðlar hafi í þeim tilvikum aukið svigrúm til að birta ósönnuð ummæli án eftirmála, yrði auðveldlega snúið upp í andhverfu sína, ef það svigrúm er notað til þess eins að heimila fjölmiðlum að fjalla fremur um mennina, sem þeir ætla að almenningur hafi áhuga á að lesa um, en málefnin sem talin eru hafa samfélagslega þýðingu. Stefndu hafa í máli þessu fullyrt að heimildir séu fyrir hendi um stórfellda fjármagnsflutninga úr landi, þó að það hafi reynst vera misskilningur að lánsféð frá stefnanda hafi komið frá Íslandi. Eftir að í ljós kom að stefnandi ætti þar ekki hlut að máli hefur lítið farið fyrir umfjöllun stefndu um þau umfangsmiklu viðskipti í trássi við gjaldeyrishöft, sem stefndu halda fram að verið hafi tilefni umfjöllunar þeirra og þeir hafi heimildir fyrir og sem gæti haft samfélagslega þýðingu að fylgja eftir. Því virðist það fremur hafa verið tilgangur fréttarinnar sem mál þetta snýst um að vekja athygli á stefnanda en gjaldeyrisviðskiptunum." Sjá dóminn í heild hér

Páll Magnússon hættir sem útvarpsstjóri og ekki kemur því til þess að taka þurfi afstöðu til þess hvort ráðningartímabil hans verður endurnýjað en því hefði lokið nú um áramótin. Tilkynning stjórnar RÚV var send starfsfólki Ríkisútvarpsins er svohljóðandi: Stjórn Ríkisútvarpsins og Páll Magnússon útvarpsstjóri hafa tekið sameiginlega ákvörðun um að hann láti af störfum frá og með deginum í dag. Í framhaldi af þessari niðurstöðu verður staða útvarpsstjóra auglýst laus til umsóknar samkvæmt lögum nr. 23/2013.

Nú um áramótin taka gildi nýjar reglur í Danmörku um fjölmiðlastyrki. Megin breytingin frá núverandi kerfi er að í grunninn er verið að breyta styrkjunum úr dreifingarstyrkjum yfir í að styrkir til framleiðslu á ritstjórnarefni. Í því felst m.a. sú mikla breyting að netmiðlar eiga auðveldara með að fá styrki en áður, en þessi tegund miðla hefur nánast ekki átt aðkomu að styrkjum itl þessa. Hugmyndin er að styrkjakerfið verði með þessu móti meira í samræmi við nútíma fjölmiðlun og endurspegli frekar fjölmiðlunina eins og hún er stundið í nútímanum. Alls munu styrkirnir nema um 403 milljónum danskra króna á ári, eða um 8,4 milljörðum íslenskra króna.  Sjá nánar hér  

Tímaritið Nýtt líf leitar að hugmyndaríkum blaðamanni í fullt starf næstu 9-10 mánuði. Þekking á tísku, hönnun eða öðrum skapandi greinum kæmi sér vel. Reynsla af blaðamennsku er skilyrði. Þarf að geta hafið störf sem fyrst. Ritstjórn blaðsins hefur einnig laus pláss fyrir öfluga starfsnema. Leitað er að meistaranemum í námi tengdu blaðamennsku sem vilja kynnast tímaritaútgáfunni. Starfsnemi gengur í öll verk ritstjórnarinnar fær vinnuframlag sitt hugsanlega metið til eininga. Óskað er eftir að fá umsókn og ferilsskrá merkta „Starfsumsókn“ senda á netfangið nyttlif@birtingur.is  Umsóknarfrestur rennur út í dag, 12 desember!

Framganga félagsmanna hægri öfgaflokksins „Gullnar dögunar“ í Grikklandi gagnvart fjölmiðlafólki veldur sífellt meiri áhyggjum. Nú síðast á mánudagskvöldið var gríski sjónvarpsfréttamaðurinn Panagiotis Bousis að dekka uppákomu sem flokkurinn stóð fyrir þegar félagsmaður í flokkum réðist að honum og myndatökumanni hans og beitti þá ofbeldi. Þannig var komið í veg fyrir að þeir gætu greint frá hvað væri að gerast. Samtök evrópskra blaðamanna (EFJ) sem og Alþjóðasamband blaðamanna (IFJ) hafa fordæmt þessa framkomu, og þá ekki sístþá staðreynd að lögreglan var nærstödd, en lét sem ekkert væri meða fréttamennirnir voru beittir ofbeldi. Sjá einnig hér

Finnska fréttastofan STT-Lehtikuva hyggst setja upp nýja útstöð í Sydney í Ástralíu í sparnaðarskyni. Hugmyndin er að flytja næturvaktir fréttastöðvarinnar sem unnar hafa verið í Finnlandi og breyta þeim í dagvaktir í Ástralíu með því að nýta tímamismuninn. Tveir blaðamenn hafa að jafnaði verið á næturvakt fréttastofunnar og munu fjórir blaðamenn verða sendir til Ástralíu til að sjá um þessar útsendingar og mun þessi fjöldi þá jafnframt dekkaðir frídaga og sumarafleysingar. Reiknað er með að þessir blaðamenn sjái um innlendu finnsku næturvaktirnar með því að notfæra sér nýja tækni s.s. netið og skype. Ráðagerð þessi er eins og áður segir sparnaðaraðgerð hjá fréttaveitunni og samkvæmt útreikningum stjórnenda mun þessi tilflutningur á „næturvaktinni“ hafa í för með sér sparnað sem nemur árslaunum eins blaðamanns, en næturvaktirnar hafa verið fyrirtækinu mjög dýrar. Blaðamannafélagið í Finnlandi hefur þegar sett sig í samband við systurfélag sitt í Ástralíu til þess að tryggja að ekki verði brotið á réttindum félagsmanna sinna. STT-Lehtikuva fréttaveitan skar niðu um fimmtung ritstjórnar sinnar og lokaði sex svæðisskrifstofum á dögunum í umfangsmiklum aðgerðum en þessi sparnaðaraðgerð hefur mælst nokkuð vel fyrir hjá þeim starfsmönnum sem eftir eru. Gengur næturvaktin nú undir nafninu „kengúru-vaktin“ hjá mönnum þar innanhúss.  

Transitions Online (TOL),( www.tol.org ) eru félagasamtök sem beina athygli sinni að fréttamiðlum í 29 fyrrum kommúnistaríkjum í Austur – Evrópu. Þessi samtök beita sér sérstaklega fyrir framgangi rannsóknarblaðamennsku í fjölmiðlum í þessum löndum. Í janúar mun TOL í samstarfi við Miðstöð rannsóknarblaðamennsku í Tékklandi beita sér fyrir viku námskeiði í rannsóknarblaðamennsku sem opið er áhugasömum blaðamönnum alls staðar að úr Evrópu. Á námskeiðinu verður farið sérstaklega í efnahagsbrot og glæpi tengda fjármálum og viðskiptalífinu og hvernig hægt er að rannsaka slíkar fréttir í gegnum heimildir og gögn á netinu. Þeir sem koma á námskeiðið fá þjálfun í þessum vinnubrögðum og geta rannsakað tiltekin mál sem nýst geta til birtingar í þeim fjölmiðlum sem viðkomandi eru í tengslum við. Nánari upplýsingar um námskeiðið er að finna hér og í leiðinni er rétt að minna á Endurmenntunarsjóð BÍ sem gæti styrkt félagsmenn eitthvað til að fara á námskeið af þessu tagi.    

MMR kannaði á dögunum traust almennings til helstu sjónvarps-, prent- og netfréttamiðla. Af þeim fréttamiðlum sem kannaðir voru báru svarendur mest traust til fréttamiðla RÚV. Af þeim sem tóku afstöðu sögðust 76,5% bera mikið traust til Fréttastofu RÚV og og 71,1% sögðust bera mikið traust til ruv.is. Í flokki netfréttamiðla naut mbl.is næst mest trausts meðal almennings (á eftir ruv.is). Af þeim sem tóku afstöðu sögðust 50,2% bera mikið traust til mbl.is. Traust til mbl.is hefur dregist nokkuð saman frá því í desember 2008 þegar 64,0% aðspurðra sögðust bera mikið traust til mbl.is.     Netfréttamiðillinn Visir.is naut einnig nokkurs traust meðal svarenda og hefur traust til Visir.is aukist frá maí 2009 þegar 24,4% þeirra sem tóku afstöðu sögðust bera mikið traust til Visir.is, borið saman við 35,3% nú. Þeir prentmiðlar sem nutu mest trausts meðal almennings voru Morgunblaðið og Fréttablaðið. Af þeim sem tóku afstöðu sögðust 46,4% bera mikið traust til Morgunblaðsins en 39,2% sögðust bera mikið traust til Fréttablaðsins. Hlutfallslega fleiri sögðust bera lítið traust til Morgunblaðsins en til Fréttablaðsins. Af þeim sem tóku afstöðu sögðust 26,1% bera lítið traust til Morgunblaðsins en 20,7% sögðust bera lítið traust til Fréttablaðsins. Traust til Morgunblaðsins hefur minnkað nokkuð frá desember 2008 þegar 64,3% sögðust bera mikið traust til Morgunblaðsins. Traust til Viðskiptablaðsins hefur aukist nokkuð frá því í maí 2009 þegar 21,8% þeirra sem tóku afstöðu sögðust bera mikið traust til Viðskiptablaðsins, borið saman við 30,6% nú.

Boðað hefur verið til almenns samstöðufundar með Ríkisútvarpinu í Háskólabíói í dag kl 18:00. Í frétt frá undirbúningshópi segir að í 83 ár hafi Ríkisútvarpið verið einn öflugasti hornsteinn íslenskrar menningar. Það hafi frá upphafi miðlað fjölbreyttri dagskrá talaðs máls, fræðslu, tónlistar og myndefnis. Þar að auki hafi Ríkisútvarpið verið öflugur framleiðandi menningarefnis og hefur lagt metnað sinn í að bera fram eitthvað fyrir alla, unga sem aldna. Á Ríkisútvarpinu hafi kunnáttufólk spunnið lifandi þráð sem tengi forna tíð og nýja á þessu landi. Ríkisútvarpið sé einn öflugasti spegill íslenskrar þjóðar. Síðan segir: „Nú hefur verið vegið að rótum sköpunarstarfs á Ríkisútvarpinu. Mikill niðurskurður fjárveitinga hefur leitt til uppsagna margra tuga starfsmanna sem af víðáttumikilli þekkingu hafa frætt þjóðina og veitt henni andlega næringu.   Ekki verður séð að þessar uppsagnir eigi sér nokkra stoð í stefnumótun eða hlutverki Ríkisútvarpsins. Þær virðast tilviljanakenndar og stjórn stofnunarinnar hefur ekki lagt fram neinar áætlanir um hvernig halda á áfram lögbundnu starfi Ríkisútvarpsins eftir þessar róttæku aðgerðir.“ Ávörp á fundinum flytja Guðmundur Andri Thorsson rithöfundur, Benedikt Erlingsson leikstjóri, Melkorka Ólafsdóttir tónlistarkona, Sigríður Ólafsdóttir lífefnafræðingur og Kolbeinn Óttarsson Proppé upplýsingafulltrúi og fyrrverandi blaðamaður. Hljómsveitin Sammi og félagar taka á móti gestum og Guðrún Pétursdóttir lífeðlisfræðingur stýrir fundinum. í tilefni af samstöðufundinum hafa verið gefin út tvö ný myndbönd og verður seinna myndbandið frumsýnt síðar í dag en það fyrra má nálgast hér.