Noregur: Fiskeldið erfitt umfjöllunarefni í fjölmiðlum
Athyglisverð umræða er nú í gangi meðal fjölmiðlafólks í Noregi um það hversu erfitt og viðkvæmt er að fjalla um fiskeldismál. Málið er ekki síst áhugavert í ljósi þess að umræðan um fiskeldi er að hefjast fyrir alvöru hér á landi og nær viðstöðulaust vitnað til reynslu Norðmanna. Svo virðist sem í Noregi séu til staðar tvær sterkar blokkir, með og á móti laxeldi í sjókvíum, sem beiti af þunga afli sínu til að gagnrýna og hafa áhrif á umfjöllun fjölmiðla. Lýsa blaðamenn því þannig að þeir séu ýmist kallaðir bjánar eða laxahatarar eða annað álíka, eftir því hvernig veður skipast. Í grein á vef norska Blaðamannafélagsins kemur fram að andstæðar blokkir séu mjög virkar í að koma sínum sjónarmiðum á framfæri og að skotgrafirnar séu slíkar að erfitt sé að finna heimildamenn sem séu óháðir hagsmunaaðilum. Báðar blokkir hafa eigin talsmenn sem vitna til eigin vísindarannsókna og tala í austur og vestur án þess að hafa sameiginlegan grundvöll til að standa á, en fiskeldið er gríðarlega mikilvæg atvinnugrein, einkum í norður Noregi.